A CLASE DOS CARACOIS XA GRAVAMOS A NOSA PRIMEIRA CANCIÓN NA RADIO DO COLE

 Os máis pequenos fomos á radio para gravar a canción que nos compuxo Txelu, o orientador do cole.

Despois de algúns ensaios  xa o temos.

 

OS NENOS E NENAS DE 4º DE INFANTIL XA TEMOS NOME PARA A NOSA AULA:

                     

               OS CARACOIS: 

Neste trimestre investigamos sobre estes animaliños así que con moito cariño escollimos chamarnos como eles.  

           " A CLASE DOS CARACOIS" 

 

SAMAÍN EN INFANTIL

 O alumnado de Infantil desfrutou dunha divertida festa de Samaín, na que as cabazas máis tenebrosas foron as protagonistas e tamén houbo tempo para poñerse mans á masa no obradoiro de cociña, elaborando unhas deliciosas galletas de cabaza.

Pasámolo de medo!!!

COMEZAMOS O NOSO PROXECTO...

 Polo Día das Bibliotecas Escolares vivimos un día moi especial na biblioteca de Quintela. Paco, a nosa mascota, preparounos unha sorpresa para dar comezo ao noso novo proxecto: "Cando chega a noite...".

Os nenos e nenas puideron gozar dun momento moi especial lendo contos á luz das lanternas, descubrindo que a biblioteca tamén pode ser un lugar máxico cando cae a noite. 

Pasámolo xenial e gozamos moitísimo desta experiencia tan diferente e divertida!

E isto non fixo máis que comezar… Cantas aventuras nos agardan cando chega a noite! 

DÍAS DAS BIBLIOTECAS ESCOLARES

Polo Día das Bibliotecas Escolares, Paco, a nosa mascota, preparou a biblioteca para dar comezo ao noso novo proxecto: «De noite».

Neste vídeo podemos ver como quedou preparada a biblioteca para que, durante a xornada de hoxe, os nenos e nenas puidesen achegarse aos novos contos e descubrir todo o que agocha a noite.

E isto non fixo máis que comezar… A noite acaba de chegar a Quintela! 

Lago Castiñeiras

 O alumnado de infantil e 1ºP disfrutou dunha mañá de outono no Lago Castiñeiras. Aproveitamos para recoñecer árbores de folla caduca, recoller castañas, landras e follas, e divertímonos todos xuntos no parque. Foi unha xornada moi divertida.

A clase de 4 anos, planta na horta

 Hoxe fomos á horta para plantar unhas remolachas. Temos que coidalas moito para que medren. Xa vos iremos contando como van!

PRÉSTAMOS DE BIBLIOTECA

 Xa comezamos co préstamo semanal en Infantil!

Cada neno e nena ten a súa carpeta e leva para a casa un libro para compartir coa familia, ler xuntos e gozar das historias tamén fóra da escola. 

E na biblioteca seguimos desfrutando moito dos contos! Temos momentos de lectura en grupo, nos que compartimos historias, e tamén ratos para mirar e ler os nosos libros ao noso ritmo.

Pouco a pouco, imos collendo gusto pola lectura e descubrindo a maxia que agocha cada conto. 

FORMACIÓN DE USUARIOS

 Antes de comezar co préstamo semanal da biblioteca, o alumnado de Infantil participou nunha xornada de formación de usuarios moi divertida.

A través dun xogo, tivemos que colocar cada libro no seu sitio, fixándonos nas etiquetas. Así, pouco a pouco, fomos descubrindo como se organizan os libros da nosa biblioteca e aprendemos a diferenciar os contos dos libros informativos. 

Aprendemos xogando e xa estamos preparados para gozar dos libros, coidalos e compartir novas aventuras con eles!

O ALUMNADO DE 4ºI VISITA A BIBLIOTECA DE PACO

 Unha vez rematada a adaptación, o alumnado de 4º de Infantil fixo un percorrido por todo o colexio para coñecer as diferentes dependencias: o comedor, o ximnasio, as aulas e, como non podía ser doutro xeito, a nosa querida biblioteca escolar. 

Alí descubrimos xuntos os diferentes espazos e recunchos da biblioteca e presentamos a un dos seus grandes protagonistas: o rato Paco, a nosa mascota! 

Estes primeiros encontros coa biblioteca son sempre momentos moi especiais, cheos de ilusión, curiosidade e emoción.

Benvidos á vosa biblioteca! Que este sexa o comezo de moitas aventuras entre libros e historias. 

NOVO XOGO NO PATIO

 

Fermosísimo o xogo do patio co que nos agasallou a ANPA para que o alumnado desfrute nos tempos de lecer.

A MERENDA DO PRIMEIRO DÍA

 Un ano máis, a nosa ANPA organizou unha merenda no primeiro día de clase. Moitas grazas!

AS FAMILIAS CONTAN

 Hoxe tivemos a última visita das familias na actividade As familias contan. María, coa axuda de Laia, contounos un conto moi especial: "O elefante que perdeu o seu ollo".

Grazas a todas as familias por participar nesta actividade lectora. Agradecemos a vosa participación, xa que fai posible seguir fomentando entre o alumnado o gusto pola lectura.

Investigamos sobre os monumentos do mundo

 Despois de traballar cos Bits da Intelixencia, o alumnado de 6ºI interesouse polos monumentos do mundo. Buscamos información na biblioteca, como aparece nunha entrada anterior, e elaboramos un mapa cos monumentos máis importantes.

A partir deste traballo e do maletín que realizamos coa información,  estamos a descubrir cales están máis preto ou máis lonxe e compartindo os nosos monumentos favoritos. Unha experiencia moi enriquecedora para seguir aprendendo sobre o mundo.

VISITA A PRIMEIRO

 Dentro das actuacións do Plan de Acollida para favorecer a transición do alumnado de 6.º de Educación Infantil a Educación Primaria, realizamos unha visita á aula de 1.º curso.

Durante a actividade, o alumnado de 1.º preparou unha exposición na que nos mostrou e explicou diferentes aspectos da súa aula e da súa dinámica diaria: o material que utilizan, a organización do estoxo, onde gardan as mochilas, a biblioteca de aula, os xogos, as libretas, a distribución e almacenamento dos materiais escolares e das pinturas, así como as rutinas diarias, a asemblea e o horario escolar.

Este intercambio resultou moi enriquecedor, xa que permitiu achegar información de primeira man e reducir posibles medos ou incertezas.

Posteriormente, aproveitando que a aula estaba libre, o alumnado puido explorar o espazo, interactuar cos diferentes materiais e xogar libremente nel, favorecendo así unha primeira toma de contacto co que será a súa futura aula e contribuíndo a unha adaptación máis segura e positiva á nova etapa educativa.

FESTIVAL LETRAS GALEGAS

 

GOZAMOS DA PRIMAVERA

 Despois dun duro inverno de chuvia, aproveitamos o bo tempo e saímos recoller flores silvestres no patio do colexio.

AS FAMILIAS CONTAN

Tivemos unha nova visita dentro da actividade "As familias contan" na clase dos canciños. A tía de Christian acompañounos para compartir un conto moi "espacial", co que gozamos dunha historia moi divertida.

Queremos agradecerlle a súa participación e, unha vez máis, dar as grazas a todas as familias que colabora nestas actividades. A súa implicación enriquece enormemente a vida da escola e fai que cada visita sexa única.

A PRIMAVERA

 Comeza a primavera e a desfrutamos pintando con pincel. cores, creatividade e moita ilusión na nosa aula.

HORA DE LER NO PATIO

 O alumnado de infantil desfrutou dunha hora de ler ao aire libre, aproveitando o bo tempo.